Partia e presidentit turk, Recep Tayyp Erdogan, ka përgatitur një projektligj, përmes së cilit qeverisë do t’i mundësohet të rrisë kontrollin e saj mbi mediat sociale, raporton Reuters.
Projektligji pritet të shqyrtohet nga parlamenti gjatë javës së ardhshme, teksa opozita ka frikë se kjo do të çojë në censurë më të madhe në vend.
Projektligji do t’i detyrojë kompanitë e mediave sociale me më shumë se 1 milion përdorues të përditshëm në Turqi, të tilla si Twitter, Facebook dhe YouTube, të hapin zyrë ose të caktojnë një përfaqësues në Turqi, i cili do t’i përgjigjet autoriteteve turke.
Ky përfaqësues, sipas autoriteteve turke, do të ishte përgjegjës për çështje tatimore dhe do ti kërkohet t’i përgjigjet brenda 48 orëve ankesave në lidhje me postimet që shkelin të drejtat personale dhe të privatësisë.
Në fillim të këtij muaji presidenti, Erdogan, u zotua se do të vëndosë nën kontroll mediat sociale, pasi vajza dhe dhëndri i tij ishin fyer në rrjetin social Twitter. Të paktën 11 persona u arrestuan dhe u morën në pyetje për këtë rast.
Sakaq, partitë e opozitës, kanë shprehur shqetësime se planet e qeverisë kanë për qëllim të kufizojnë më tej aftësinë e qytetarëve për të pasur qasje në mediat sociale dhe për të lexuar lajme dhe informacione të pavarura, në një mjedis të mbizotëruar nga media pro-qeveritare./Opinion.al
