Presidenti turk Rexhep Tajip Erdogan ka paraqitur në parlamentin e Turqisë për ratifikim një protokoll për pranimin e Suedisë në NATO, tha zyra e tij.
Erdogan kishte vonuar ratifikimin e anëtarësimit të Suedisë, duke akuzuar Stokholmin se ishte shumë i butë ndaj militantëve kurdë dhe grupeve të tjera që ai i konsideron si kërcënime të sigurisë. Turqia gjithashtu u zemërua nga një seri protestash për djegien e Kuranit në Suedi.
Të 31 aleatët e NATO-s duhet të mbështesin anëtarësimin e Suedisë. Turqia dhe Hungaria ende nuk e kanë ratifikuar atë.
Një deklaratë e shkurtër nga drejtoria e komunikimit presidencial tha se Erdogan kishte nënshkruar protokollin për pranimin e Suedisë në NATO, i cili më pas iu dorëzua Asamblesë së Madhe Kombëtare të Turqisë.
Nuk dihej menjëherë se kur anëtarësimi i Suedisë do të vinte në diskutim.
Në fillim të këtij muaji, Sekretari i Përgjithshëm i NATO-s, Jens Stoltenberg i kërkoi Turqisë të ratifikojë shpejt anëtarësimin e Suedisë në organizatën ushtarake.
“Shumë aleatë do të donin të shihnin përparim të shpejtë në këtë ratifikimi”, tha Stoltenberg për Associated Press pas kryesimit të një takimi të ministrave të mbrojtjes të NATO-s në Bruksel. “Suedia e ka përmbushur atë që premtoi dhe tani na duhet ratifikimi i anëtarësimit suedez”.
Ndërkohë, Suedia dhe fqinji i saj Finlanda braktisën dekada të mosangazhimit ushtarak pasi Presidenti Vladimir Putin urdhëroi trupat ruse të pushtonin Ukrainën në shkurt të vitit 2022, duke kërkuar mbrojtje nën ombrellën e sigurisë së NATO-s. Finlanda iu bashkua aleancës ushtarake në prill./Opinion.al
