Turqia do të përgatisë një projekt-ligj për të kontrolluar platformat e mediave sociale ose për t’i mbyllur ato, njoftoi presidenti turk, Recep Tayyip Erdogan. Ai shtoi se familja e tij ishte fyer në internet.
Ministri i Financave Berat Albayrak, dhëndri i Erdoganit, njoftoi përmes një postimi në rrjetin social Twitter se ishte bërë baba për herë të katërt. Por, gruaja e Albayrak dhe e bija e Erdoganit, Esra ishte fyer nga disa përdorues, të cilët u arrestuan më vonë.
Partia për Drejtësi dhe Zhvillim do të paraqesë projekt-ligjin duke argumentuar se një rritje e “akteve imorale” viteve të fundit është pasojë e mungesës së rregullave.
“Këto platforma nuk i përshtaten këtij kombi. Ne duam t’i mbyllim, t’i kontrollojmë ato duke sjellë një projekt-ligj në parlament sa më shpejt të jetë e mundur”, tha Erdogan.
Ai tha se kompanitë e mediave sociale do të detyroheshin të emëronin përfaqësues në Turqi, për t’iu përgjigjur kërkesave ligjore.
Në muajin qershor, Turqia kritikoi ashpër kompaninë Twitter për pezullimin e më shumë se 7,000 llogarive që mbështesnin presidentin Erdogan, duke thënë se kompania po njollos qeverinë dhe po përpiqet të ndikojë politikën turke./Opinion.al
