Vizita e presidentit kroat, Zoran Milenoviç, në Shqipëri më 12 dhe 13 gusht duket se mund t’i hapë atij probleme pasi sipas Komisionit për Përcaktimin e Konfliktit të Interesit në Kroaci kjo vizitë është e pa dokumentuar.
Mediat kroate shkruajnë se raporti i Komisionit thotë se Milanoviç ishte në Shqipëri në 12 dhe 13 gusht me ftesë personale të kryeministrit shqiptar Edi Rama, çka mund të nënkuptojë se ka marrë një dhuratë të paligjshme. Gjithashtu, raporti kujton se Milanoviç nuk ishte më këshilltar i Kryeministrit shqiptar Rama para se të bëhej Presidenti i Republikës.
Ata pretendojnë se ka pasaktësi në deklaratat e presidencës në lidhje me këtë vizitë, ku në fillim u tha se ishte private dhe shpenzimet u mbuluan nga vetë Milanoviç dhe tani thuhet se ishte zyrtare dhe shpenzimet u mbuluan nga paratë e taksapaguesve.
Duke u nisur nga ky deklarim, ata i kanë kërkuar të dhëna Shqipërisë, konkretisht kryeministrit Rama në lidhje me vizitën në fjalë, të cilën Milanoviç e kreu duke ardhur me një jaht ushtarak të Kroacisë, që më herët e kishte përdorur edhe ish-lideri jugosllav, Tito.
Sipas raportimit të mediave kroate Zyra e Presidentit njoftoi në 12 gusht se Milanoviç po qëndronte në Shqipëri privatisht, me ftesë personale të Kryeministrit Edi Rama. Detyrat presidenciale nuk janë regjistruar zyrtarisht në faqet e internetit të Zyrës së Presidentit, as në faqet e kryeministrit Ramës, i cili është shumë aktiv në rrjetet sociale.
Presidentja e Komisionit për të vendosur mbi konfliktin e interesit, Natasha Novakoviç, konfirmoi dje për RTL se përgjigja e Presidencës që mbërriti pasdite ka disa informacione kontradiktore.
“Komisioni ka një letër nga zyra e tij që informon mediat se ai do të mungojë në 12 dhe 13 gusht sepse ai ka një udhëtim privat në Shqipëri. Nga ana tjetër, sot morëm një letër se ai ishte në një udhëtim zyrtar. Nuk e morëm dokumentacionin e kërkuar nga komisioni. Ne do të duhet të përsërisim letrën për të marrë dokumentacionin që tregon se kush ka paguar për udhëtimin, pse shkoi, nëse ai shkoi zyrtarisht apo jo, vetëm kjo deklaratë nuk është e mjaftueshme”, tha Novakoviç, duke shtuar se Komisioni do të vazhdojë të merret me këtë çështje./ Opinion.al
