Kryetari i Lëvizjes Vetëvendosje, Albin Kurti shpalli mbrëmë fitoren e forcës së tij politike pas zgjedhjeve të parakohshme parlamentare në Kosovë. Sot ai ka përshëndetur procesin zgjedhor dhe ka falënderuar qytetarët.
Në një status në Facebook, Kurti shkruan se populli vendosi që VV ti prijë ndryshimit që kërkon Kosova. Ai thekson se vota e qytetarëve ka shpëtuar Kosovën nga “zvetënimi i mëtutjeshëm” dhe “drama kosovare e shtetit të kapur” duke nënvizuar se punët që e presin ja shtojnë vullnetin.
Statusi i Albin Kurtit
Mirëmëngjes të dashur qytetarë,
Prej mbrëmë ka shpresë. Sepse dje pati guxim. Ju votuat masivisht duke bërë që opozita e deridjeshme të korrë fitore bindëse. Ndryshimi ndodhi. Dhe, jo vetëm kaq. Populli vendosi që këtij ndryshimi i prin dhe do t’i prijë Lëvizja VETËVENDOSJE!.
Të gjithë ju që keni votuar dje u jam falënderues që keni kryer detyrën qytetare e obligimin demokratik në një kohë të vështirë siç është kjo që po kalojmë dhe në një vend të dashur siç është Kosova jonë.
Të gjithë ju që keni votuar për ndryshimin, e sidomos për VETËVENDOSJE!-n, u jam mirënjohës për vetëdijen e lartë dhe ndërgjegjen e thellë për ta shpëtuar republikën tonë nga zvetënimi i mëtutjeshëm.
Qytetarët folën me votën e tyre. Ata ndërhynë masivisht në skenën politike në mënyrë që drama kosovare e shtetit të kapur të mos ketë fund tragjik. Urtësia e popullit tonë në çastet vendimtare ishte asgjë më pak sesa fantastike.
Tash, ne duhet të punojmë. Ama sërish bashkë me qytetarët. Kurrë anash apo prapa qytetarëve. Bashkë, gjithnjë.
Punët e vështira që na presin vetëm sa ma shtojnë vullnetin. Ato nuk kanë llogari me neve, me juve, me mua.
Sepse: Erdhi dita!
Ju falemnderit të gjithëve dhe secilit. /Opinion.al
