Drejtoria e Përgjithshme e Burgjeve ka bërë me dije se ditën e sotme në orët e para të mëngjesit, ka ndërruar jetë në Qendrën Spitalore të Burgjeve, Njazi Raki Ceka, 86 vjeç, i dënuar me burgim të përjetshëm për vrasje.
Në njoftimin për media bëhet e ditur se nga vlerësimi paraprak, konstatohet se vdekja e pacientit ka qenë pasojë e vetëvarjes në tualetin e dhomës së tij.
Po ashtu thuhet se institucionet e prokurorisë dhe policisë gjyqësore janë duke kryer hetimet për shkaqet e ndërrimit të jetës të 86-vjeçarit.
Njazi Raki Ceka, i burgosur me dënim të përjetshëm, ndodhej i shtruar në Spitalin e Burgjeve prej datës 01 qershor 2023, për probleme kardiake. Ai ishte transportuar nga burgu i Durrësit, ku ishte i akomoduar në Seksionin e Kujdesit të Veçantë, për arsye të gjendjes së tij shëndetësore.
Drejtoria e Përgjithshme e Burgjeve thotë se pas konstatimit të ngjarjes së rëndë janë njoftuar familja e të ndjerit si dhe organet hetimore.
Ndërkaq, një ekip i DPB me urdhër të Drejtorit të Përgjithshëm, është paraqitur në vendngjarje, për të vlerësuar situatën dhe veprimet e stafit, nga ora 07.00 e mëngjesit të sotëm./ Opinion.al
