Një tjetër funksionar publik është vënë në pranga në vijim të hetimeve dhe në vijim të operacionit të koduar “Tjetërsimi i Lagunës”. Ky operacion nisi rreth 1 muaj më parë, për goditjen e veprimtarive të paligjshme që po zhvilloheshin në zonën e mbrojtur të Kune Vain, në të cilat u përfshinë 4 funksionarë publikë, 3 prej të cilëve u ndaluan, ndërsa 1 tjetër u shpall në kërkim.
Policia bën me dije se në kuadër të hetimeve është zgjeruar sipërfaqja e zonave të mbrojtura të verifikuara për veprimtaritë e paligjshme që kryhen në to.
Tashmë është ndaluar edhe Pjetër Luka, 62 vjeç, banues në Grykë Lumi, Tale, me detyrë kryetar i këtij fshati, për të cilin Gjykata e Shkallës së Parë Lezhë ka caktuar masën e sigurisë “Arrest në burg”, për veprën penale “Falsifikimi i dokumenteve”.
62-vjeçari, dyshohet se në periudha të ndryshme kohore, ka përpiluar dhe lëshuar dokumente të falsifikuara, me qëllim tjetërsimin e kësaj prone, në favor të të tretëve.
Gjatë kontrollit në banesën e tij, oficerët e Policisë kanë gjetur dokumente të ndryshme të dyshuara të falsifikuara me të dhëna të rreme.
Vijon operacioni, për identifikimin dhe kapjen e personave të tjerë të përfshirë në këtë veprimtari kriminale.
