Policia e Tiranës ka vënë në pranga ditën e sotme shtetasin Edmond Saraçi, 53 vjeç, i dyshuar si autor i ngjarjes së ndodhur pesë ditë më parë në rrugën “Muhamet Deliu”, ku u qëllua me armë zjarri automjeti i një personi me inicialet P.P.
Burimet policore thanë se gjatë kontrollit të ushtruar nga shërbimet e policisë të Komisariatit nr.4, ati i është sekuestruar edhe lëndë narkotike “heroinë”, armë zjarri e llojit “pistoletë” me silenciator, lëndë eksplozive me kapsolle detonatore, granatë luftarake dhe municion.
Plumba ndaj makinës
Nga hetimet e kryera dyshohet se ky shtetas është autor i ngjarjes së ndodhur më 10 shtator, gjatë natës, në rrugën “Muhamet Deliu”, është qëlluar me armë automjeti i shtetasit P.P..
Ky i fundit e kishte parkuar makinën e tij “Benz ML” pranë banesës, kur në mëngjes e ka gjetur të dëmtuar.
Në vendngjarje u sekuestruan, një këmishë fisheku, dy predha, një gëzhojë dhe 2 fishekë.
Materialet iu referuan Prokurorisë së Rrethit Gjyqësor Tiranë, në ngarkim të shtetasit të lartpërmendur, për veprat penale “Prodhimi dhe shitja e lëndëve narkotike” dhe “Prodhimi dhe mbajtja pa leje e armëve dhe municionit luftarak”.
