Policia ka vënë në pranga një 47-vjeçar, pjesë e një grupi kriminal në trafikimin e lëndëve narkotike në vitin 2018.
Bëhet e ditur se, Orges Islami, banues në Gjirokastër, u lokalizua në afërsi të zonës së quajtur “Liqeni i Thatë” në kryeqytet.
Ai ishte shpallur në kërkim pasi Gjykata e Rrethit Gjyqësor Pogradec, me vendimin e datës 29.07.2020, e ka dënuar me 6 vite e 8 muaj burgim nga të cilat i kanë mbetur për të vuajtur 2 vjet e 8 muaj e 4 ditë burgim, për veprën penale “Trafikimi i narkotikëve”, kryer në bashkëpunim, parashikuar nga neni 283/a/2 i Kodit Penal.
Islami ka qenë pjesë e një grupi kriminal në vitin 2018 në trafikimin e lëndëve narkotike me shtetet e BE-së.
Në goditjen e këtij grupi kriminal në vitet 2017-2018, janë zhvilluar 12 operacione policore kombëtare dhe ndërkombëtare konkretisht në Shqipëri, Greqi, Turqi, Maqedoni, Itali, ku janë arrestuar gjithsej 66 shtetas midis tyre të huaj dhe shqiptarë si dhe janë sekuestruar 8.4 ton lëndë narkotike Cannabis Sativa, municione luftarake, automjete, telefona, si dhe shuma të konsiderueshme parash.
