Policia e Tiranës ka arrestuar një 45-vjeçar pasi akuzohet për veprat penale “Mbajtja pa leje dhe prodhimi i armëve, armëve shpërthyese dhe i municionit”, “Prodhimi dhe mbajtja pa leje e armëve të gjuetisë dhe sportive” dhe “Mbajtja pa leje e armëve të ftohta”.
Po ashtu policiaka arrestuar dhe M. M., 33 vjeç, banues në Tiranë, për veprën penale “Moskallëzimi i krimit”.
Policia thotë se në rrugën “Agush Gjergjevica”, shërbimet e Policisë kanë ndaluar automjetin me drejtues shtetasin M. M. dhe pasagjer shtetasin Ermir Kroqi 45-vjeç.
Gjatë kontrollit në çantën e dorës së shtetasit Ermir Kroqit, shërbimet e Policisë gjetën dhe sekuestruan, në cilësinë e provës materiale, një armë zjarri pistoletë, municion luftarak dhe një silenciator.
Në vijim të veprimeve, gjatë kontrollit të banesës së Kroqit, shërbimet e Policisë gjetën një pushkë sportive, tre thika dhe municion luftarak. Shtetasi M. M. ka patur dijeni se 45-vjeçari ishte i armatosur, por nuk ka kallëzuar.
