Një tjetër rast korrupsioni është goditur në një universitet në vendin tonë. Mësohet se një pedagog i Universitetit të Korçës dhe një person tjetër janë arrestuar, pasi dyshohet se merrnin para në këmbim të dhënies së provimit për studentët.
Sipas informacioneve, të arrestuarit janë pedagogu i Fakultetit të Shkencave Sociale në universitetin “Fan Noli”, Alket Dino dhe sekseri Xhevi Dervishi.
Policia shprehet se ata janë kapur secili me një sasi prej përkatësisht 300 euro dhe 50 mijë lekë të reja, të dyshuara të përfituara nga studentët, në këmbim të dhënies së provimeve.
Korrupsioni në universitete është një ndër problemet më të mëdha në Shqipëri. Kujtojmë se, më herët arrestime dhe ndalime të pedagogëve ka pasur dhe në universitetin e Elbasanit, i cili renditet ndër më problematikët në vend.
Njoftimi i policisë
Korçë-Specialistët për Hetimin kundër Korrupsionit në Drejtorinë Vendore të Policisë Korçë, nën drejtimin e SPAK, bënë arrestimin në flagrancë të shtetasve:
A.D., 34 vjeç, banues në Korçë (me detyrë pedagog pranë Fakultetit të Shkencave të Natyrës dhe atyre Humane) dhe Xh. D., 35 vjeç (sekser) të dy banues në Korçë.
Shtetasit e mësipërm, janë kapur në afërsi të këtij Fakulteti me një sasi prej 300 eurosh dhe 50 000 lekë, të cilat nga hetimet e kryera dyshohet se i kanë përfituar në mënyrë të kundërligjshme nga studentët, të cilat u sekuestruan në cilësinë e provës materiale.
Materialet i kaluan Prokurorisë së Posaçme Kundër Korrupsionit dhe Krimit të Organizuar Tiranë për veprat penale “Korrupsioni pasiv i personave që ushtrojnë funksione publike”, “Korrupsioni aktiv” dhe “Ushtrimi i ndikimit të paligjshëm”./ Opinion.al
