Policia e Dibrës, sot, ka arrestuar shtetasin Besmir Sulaj, 31-vjeç, i shpallur në kërkim për vrasje me paramendim mbetur në tentativë dhe prodhim të lëndëve narkotike e mbajtje pa leje të armëve luftarake.
Burimet policore thanë se 31 vjeçari është arrestuar në zonën e Zerqanit, Bulqizë pas shqetësimeve të banorëve të zonës se një person qarkullonte me armë zjarri , duke u shndërruar në shqetësim për komunitetin; pas këtij sinjali, efektivët e Komisariatit të Policisë Bulqizë, në bashkëpunim me strukturat e Drejtorisë Vendore të Policisë Dibër, kanë organizuar dhe finalizuar me sukses operacionin policor të koduar “Zerqani”.
Bazuar edhe mbi informacionet e marra në rrugë operative se shtetasi Besmir Sula (Zeneli), 31 vjeç, banues në Tiranë, po qarkullonte me një automjet “Land Rover”, me targa false, Tr 95 65 P, në dalje të qytetit Bulqizë , në zonën e quajtur ‘Pishat’, kanë bërë të mundur bllokimin e automjetit me të cilin udhëtonte ky shtetas si dhe kapjen e arrestimin e tij.
Shtetasi i lartpërmendur do ti dorëzohet Drejtorisë Vendore të Policisë Tiranë për veprime të mëtejshme, ku krahas veprave për të cilat është shpallur në kërkim do të procedohet edhe për kundërshtim me dhunë të forcave të policisë si dhe mbajtja pa leje e armëve dhe municioneve luftarake.
