Çështja e emrit të stadiumit të ri kombëtar që pritet të inaugurohet në nëntor ka hapur një debat mes FSHF-së dhe zëvendës kryeministrit Erion Braçe. Administratori i stadiumit, Bradhy Minxhozi ka reaguar pas qëndrimit të zv/kryeministrit duke u shprehur se vendosja e një emri komercial do të garantonte financa të sigurta dhe për këtë ka disa precedentë në Europë.
“Kur nuk tregtoni dot garën tuaj mos shisni Qemal Stafën” shkruajti Braçe në qëndrim ditën e djeshme ku theksonte se stadiumet e kryeqyteteve kryesore të Europës nuk kanë emra komercialë dhe sipas tij stadiumit të ri duhet ti mbetet emri “Qemal Stafa”.
Megjithatë, në reagimin e sotëm të Minxhozit të publikuar në faqen zyrtare të FSHF-së argumenton se kërkimi i një sponsori për të mbajtur emrin e stadiumit do të garantojë financa si dhe nuk është një shpikje shqiptare.
“Stadiumi i ri ka kushtuar shumë. Mirëmbajtja dhe menaxhimi i tij, do të kushtojë gjithashtu shumë. FSHF nuk ka qëllim tjetër veçse të garantojë të ardhmen e këtij impianti. Dhe kjo është një rrugë e njohur dhe jo një shpikje shqiptare” shkruhet në reagimin e administratorit të stadiumit. Ai shton se vetëm 3 stadiume në Premier League nuk kanë emra tregtarë dhe përmend disa shembuj të ekipeve të njohura të europës që kanë stadiume me emra komercialë. Minxhozi e konsideron reagimin e zv/kryeministrit Braçe të frymëzuar politikisht dhe “përsiatje dhe këndvështrim i një personi, që në edicionin e radhës së përbaltjes, ende nuk e ka të qartë se si prononcohet: Si pushtetar? Apo si tifoz “i shqetësuar”, apo si politikan që kërkon kredo politike”. /Opinion.al
