Kreu i Partisë së Lirisë, Ilir Meta ka dalë ditën e sotme në një deklaratë për media, gjatë së cilës ka komentuar vendimin për të mos të vendosur emrin e Sali Berishës në fletën e votimit.
Gjatë fjalës së tij, Meta tha se kjo është një lojë e Edi Ramës, ku sipas tij nuk do të ketë asnjë ndikim tek votuesit.
Ndër të tjera ai theksoi se është zgjedhje e forcave politike që përbëjnë koalicionin që të paraqiten me një emër ose jo.
“Zero ndikim tek votuesit, lojërat që bën Edi Rama në panikun e humbjes së rëndë që e pret në 14 maj me cic-mice të tilla që turpërojnë Kolegjin Zgjedhor dhe çdo institucioni që pretendon se është i pavarur. Është zgjedhje e forcave politike që përbëjnë koalicionin që të paraqiten me një emër apo jo dhe po kështu mund të jetë dhe duhet të jetë emri në rast se është e domosdoshme.
Këto lojëra nuk ka qytetarë të Tiranës dhe Shqipërisë që nuk e kupton hallin e madh që ka gjetur Ramën. Ai nuk ka kandidatë përballë kandidatëve tanë, ka ca kukulla të stërprovuara, stërkonusmuara, që kanë firmosur për të vjedhur e ndarë plaçkën e pushtetit vendor, bashkë me Ramën, një pjesë prej tyre i ka çuar nëpër burgje se nuk i mbante dot, ca të tjerë kanë dhënë dorëheqjen e të tjerë presin radhën për të shkuar atje ku e kanë vendin shpërdoruesit e taksave dhe ligjeve”, tha Meta./Opinion.al
