Policia e Tiranës ka sekuestruar ditën e sotme rreth 14 kg kanabis, 1 automjet dhe 2 aparate celular si dhe u vu në pranga drejtuesi i mjetit ku u gjet lënda narkotike.
Ndërkaq bëhet me dije se është finalizuar operacionin antidrogë i koduar “Itinerari”. Mësohet se i pasojë e finalizimit të operacionit policor, i arrestuar ka mbetur shtetasi Jeton Lazri 53 vjeç, banues në Peshkopi.
Njoftimi i policisë:
Në vijim të goditjeve të njëpasnjëshme ndaj veprimtarisë kriminale në fushën e narkotikëve, bazuar dhe në informacionet e marra në rrugë operative se një 53-vjeçar që merrej me shitjen e lëndëve narkotike po lëvizte me mjet nga Peshkopia në drejtim të Tiranës, Seksioni për Hetimin e Narkotikëve në DVP Tiranë ka zhvilluar operacionin antidrogë të koduar “Itinerari”, në kuadër të të cilit u arrestua në flagrancë shtetasi:
- J. L., 53 vjeç, banues në Peshkopi.
Gjatë kontrollit të ushtruar në mjetin me të cilin po qarkullonte ky shtetas, në vendin e quajtur “Ura e Institutit”, shërbimet e Policisë kanë gjetur rreth 14 kg lëndë të dyshuar cannabis sativa.
Në cilësinë e provës materiale janë sekuestruar lënda narkotike, automjeti dhe 2 aparate celular. Materialet iu referuan për veprime të mëtejshme, Prokurorisë së Rrethit Gjyqësor Tiranë, për veprën penale “Prodhimi dhe shitja e narkotikëve”./Opinion.al
