Ardian Capja mësohet se ka qenë shënjestra e atentatit të sotëm në Elbasan. Breshëri armësh u shkrehën në lagjen Emin Matraxhiu të këtij qyteti. News 24 raporton se “autorët kanë patur për qëllim të vrasin Ardian Capjan por ai u ka shpëtuar plumbave. Ai ka shpëtuar për të dytën herë atentatit”.
Ngjarja ndodhi sot paradite, ndërsa autorët dogjën makinën e tyre disa metra më larg në lagjen “5 Maji” duke arritur të largohen me një tjetër mjet. Policia jep pak informacione për ngjarjen, dhe deri tani atentatorët nuk janë zbuluar. Aktualisht në Elbasan shkuan katër mjete të blinduar të forcave RENEA.
Historia e përgjakshme
Në vitin 2016 u ekzekutuan katër persona nga fisi Çapja në Elbasan.
E gjithë historia e gjakderdhjes mes dy fiseve nis në dhjetor të vitit 2005 kur tre persona të maskuar vranë brenda ambienteve të një lokali pranë Universitetit të Elbasanit 33-vjeçarin Sokol Çapja.
Pas vrasjes së Sokol Çapjas, në këtë seri të gjatë vrasjesh do të përfshiheshin tetë familje. Pas kësaj vrasjeje do të ndodhnin një seri atentatesh në Elbasan, Tiranë si edhe jashtë vendit ndaj anëtarëve të fisit Mema, por edhe të të afërmve të personave të dyshuar si pjesëmarrës në atentatin ndaj Sokolit.
Konflikti vazhdon në Elbasan dhe atentati me i fundit është vetëm një prej shumë të tjerëve që janë bërë në 15 vite.
*Më poshtë pamje nga vendi i ngjarjes
