Të shtëna me armë zjarri janë raportuar mbrëmjen e sotme në aksin rrugor Orikum- Llogara, në Dukat- Fushë të Vlorës.
Ngjarja ka ndodhur rreth orës 21;00 ku nga informacionet e para mësohet se është qëlluar në drejtim të një automjeti tip ‘Mercedes Benz’ më shumë se 10 herë, duke lënë kështu të vdekur një person. Viktima është një 27-vjeçar, i identifikuar si Benjamin Bezhani.
I riu ka jetuar në shtetin italian ku edhe ka qënë i dënuar më herët, e pikërisht në këtë pistë është duke hetuar policia.
Nga njoftimit zyrtar, 27-vjeçari është konstatuar nga një qytetar në rrugë, i cili ka telefonuar policinë se një trup i pajetë ndodhej brenda një automjeti të ndaluar.
Policia është nisur drejt vendit të ngjarjes për zbardhjen e plotë të shkaqeve dhe ka ngritur kontrolle në disa pika kyçe të qytetit bregdetar. Ndërkohë po kontrollohen të gjithë automjetet që vijnë nga Dukat Fusha.
Njoftimi i Policisë Vlorë:
Më datë 01.12.2020, rreth orës 21:00, në Sallën Operative Vlorë ka ardhur një telefonatë nga një qytetar se në Fushë- Dukat, Orikum një automjet ka ndaluar në rrugë dhe brenda tij ka një person të pa jetë.
Menjëherë kanë shkuar shërbimet e Policisë dhe kanë konstatuar të pajetë shtetasin B. B., rreth 27 vjeç, dyshohet ka humbur jetën nga përdorimi i armës së zjarrit.
Shërbimet e Drejtorisë Vendore të Policisë Vlorë dhe të Stacionit të Policisë Orikum kanë ngritur pika kontrolli dhe po kontrollojnë zonën për shoqërimin e personave të dyshuar si autorë të ngjarjes apo që mund të kenë dijeni për ngjarjen.
Grupi hetimor nën drejtimin e Prokurorisë po vijon punën për sqarimin e rrethanave të ngjarjes, me qëllim identifikimin dhe kapjen e autorëve.
