Një shqiptar, 25 vjeç është arrestuar nga policia britanike pasi kishte kthyer banesën në Ashford në një fabrikë kanabisi. Shqiptari i identifikuar si Robert Jaku është kallëzuar nga fqinjët e tij pasi kishin vënë re sjellje të dyshimta.
Policia ka hyrë më forcë në shtëpinë e shqiptarit, ku dhe kanë zbuluar “fabrikën” e kanabisit me më shumë se 300 bimë të mbjella, gjethet e të cilave ishin lënë për tu tharë.
25-vjeçari shqiptar u gjet i fshehur në mesin e bimëve të kanabisit, ndërsa rezultoi se ishte një emigrant i paligjshëm i ardhur në Britani me kamion para dy vitesh.
Gjatë marrjes në pyetje, Robert Jaku u tha oficerëve se ai ishte thjesht ‘kopshtari’ i lëndës narkotike dhe jo pronari. Ai tha se ishte takuar rastësisht në një lokal me shpërndarësit e drogës para 10 javëve dhe ata i kishin ofruar 6,000 paund për t’u kujdesur për ‘fabrikën’.
Prokurori Vivian Walters tha në gjykatën e Canterbury Crown se bimët narkotike ishin mbjellë në dhomën e ndenjes dhe në 2 dhomat e gjumit. Ndërkohë nga ana e tij shqiptari tha se kishte ardhur në Britani për të punuar në një firmë ndërtimi, por kishte dëmtuar gjurin dhe e kishte të pamundur të kërkonte ndihmë në spitalet publike, pasi ishte i paligjshëm dhe mund ta arrestonin.
Ai tha para gjykatës se operacioni në këmbë kushtonte 5 mijë paund, ndërsa i ofruan 6 mijë paund për t’u kujdesur për bimët e kanabisit si dhe të niste dhe fikte dritat. Gjykata mendon se shqiptari ka thënë të vërtetën, por ka vendosur ta dënojë me 2 vite e 9 muaj burg nën akuzën e prodhimit të kanabisit. 25 vjeçari pritet të dëbohet nga Mbretëria e Bashkuar pasi të kryejë dënimin.
