Një 21-vjeçar është arrestuar nga Policia e Shijakut pasi akuzohet për armëmbajtje pa leje.
Sipas informacioneve, i arrestuari është identifikuar si Geri Metaj, i cili është konstatuar nga policia teksa lëvizte me armë zjarri.
Ndërkohë, në cilësinë e provës materiale autoritetet kanë sekuestruar një pistoletë TT, model 54 dhe 14 fishekë. Metaj u arrestua në fshatin Sallmone të Shijakut gjatë orëve të vona të mbrëmjes.
I riu nuk është një emër i panjohur për policinë. Në nëntor të 2018 ai u arrestua së bashku me disa persona të tjerë, pasi akuzoheshin për disa grabitje dyqanesh dhe lokalesh.
Njoftimi i policisë
Shijak/Durrës
Goditet një tjetër rast i armëmbajtjes pa leje.
Qarkullonte me automjet me targa të vjedhura dhe mbante armë zjarri me vete, kapet dhe arrestohet në flagrancë 21-vjeçari me precedent të mëparshëm penal.
Sekuestrohen në cilësinë e provës materiale një armë zjarri dhe municion luftarak.
Shërbimet e Operacionales në DVP Durrës, në bashkëpunim me shërbimet e Komisariatit të Policisë Shijak, në vijim të punës për kapjen e personave në kërkim dhe atyre që qarkullojnë me armë zjarri me vete dhe si rezultat i kontrolleve të shtuara për rritjen e parametrave të sigurisë, arrestuan në flagrancë shtetasin:
G. M., 21 vjeç, banues në Durrës, i dënuar më parë për vjedhje.
Shërbimet e Policisë, në vendin e quajtur “Sallmone”, Shijak, kanë ndaluar mjetin tip “Mercedez Benz”, i cili rezultoi me targa të vjedhura, me drejtues shtetasin G. M. dhe pas kontrollit të ushtruar, në derën e automjetit u gjet një armë zjarri pistoletë “TT”, me dy karikatorë me 14 fishekë, të cilët u sekuestruan në cilësinë e provës materiale.
Materialet i kaluan Prokurorisë së Rrethit Gjyqësor Durrës, për veprën penale “Armëmbajtja pa leje”, për të cilën parashikohet dënimi me burgim deri në 7 vjet./ Opinion.al
