Një 31-vjeçar shqiptar është shpallur në kërkim nga policia britanike pasi akuzohet për trafikim të emigrantëve në drejtim të ishullit.
Mediat britanike shkruajnë se policia iu ka kërkuar informacion qytetarëve që kanë dijeni për vendndodhjen e 31-vjeçarit Terenc Malja.
Malja, i cili ka lidhje me njerëz në Isle of Wight, Londrën Veriore, Birmingham, Coventry dhe zonën e Edinburgut të Skocisë, është akuzuar për komplot për të lehtësuar kryerjen e një shkeljeje të ligjit të imigracionit në lidhje me një hetim SEROCU.
Nga mediat britanike bëhet me dije se për të riun shqiptar është lëshuar një urdhër arresti.
Ndërsa policia ka vënë në dispozicion tiparet fizike të Terenc Maljat.
“Malja është i bardhë, 1.47 cm i gjatë, ka flokë të zinj të shkurtër dhe sytë blu. Ai flet anglisht me theks shqiptar dhe ndonjëherë përdor emra të tjerë. Ai u pa për herë të fundit në Portsmouth në janar 2021 dhe oficerët kanë punuar prej asaj kohe për ta gjetur atë”, thuhet në njoftimin e SEROCU.
Ndërkohë Detektivi Adam Knight, i SEROCU që po merret me ngjarjen ku është përfshirë 31-vjeçari shqiptar ka thënë: “Nëse besoni se e keni parë ose keni ndonjë informacion se ku mund të jetë Terenc Malja, ju lutemi mos i afroheni atij dhe në vend të kësaj kontaktoni policinë.”/Opinion.al
