Një 23-vjeçar shqiptar ka humbur jetën tragjikisht në një aksident të ndodhur mëngjesin e së mërkurës, në ishullin e Kretës në Greqi.
Mediat greke shkruajnë se, 23-vjeçari Kristian Nako po udhëtonte me motor kur në rrethana ende të paqarta është përplasur me një kamion në zonën e Mastabës.
Përplasja ishte aq e fortë sa banorë të zonës fillimisht menduan se bëhej fjalë për shpërthim. I riu shqiptar gjeti vdekjen e menjëhershme, ndërsa identifikimi i tij u bë i mundur vetëm disa orë më vonë.
Autoritetet greke arrestuan shoferin e kamionit, një 39-vjeçar grek, ndërsa hetimet për ngjarjen e rëndë vijojnë.
Vdekja e parakohshme e të riut ka tronditur rëndë familjarët e miqtë e tij por edhe komunitetin shqiptar në Kretë, Rethimno, Hanja dhe Iraklio.
23-vjeçari ishte në vitin e fundit të studimeve në Bullgari për mjekësi.
