Pas Vlorës edhe qyteti i Lushnjës është tronditur nga një vrasje me armë zjarri. Policia bën me dije se një 62-vjeçar është vrarë dhe është plagosur djali i tij. Ngjarja e rëndë ndodhi në lokalin në pronësi të viktimës në fshatin Fier i Ri. Viktima është identifikuar si Hirakli Qorri 62 vjeç dhe i plagosur mbeti djali i tij Kejdi Qorri 31 vjeç.
Autori i dyshuar Sofokli Shani 57 vjeç pas një konflikti të çastit ka qëlluar me armë zjarri 62-vjeçarin duke e lënë të vdekur në vend. Ndërsa plagosi edhe djalin e tij.
Ndërkohë policia bën me dije se është bërë të mundur arrestimin e autorit të dyshuar, Sofokli Shani.
“Kapet nga Policia disa minuta pas kryerjes së krimit autori i vrasjes së 62-vjeçarit dhe plagosjes së djalit të tij në fshatin Fier i Ri, Lushnjë.
Në datë 02.06.2021, rreth orës 23:47, në fshatin Fier i Ri, Lushnjë, shtetasi S.Sh, si pasojë e një konflikti të çastit në lokalin në pronësi të shtetasit R. Q., ka vrarë me armë zjarri shtetasin R. Q., 62 vjeç dhe ka plagosur djalin e tij, shtetasin K. Q., 31 vjeç, i cili ndodhet në spitalin e Lushnjes nën kujdesin e mjekëve.
Menjëherë shërbimet e Komisariatit të Policisë Lushnjë kanë shkuar në vendngjarje dhe falë reagimit në kohë dhe punës së mirëorganizuar, bënë të mundur kapjen e autorit të dyshuar të ngjarjes, shtetasin S. Sh., 57 vjeç, banues në fshatin Krutje e Sipërme.
Gjithashtu Policia ka sekuestruar në cilësinë e provës materiale armën e zjarrit automatik me të cilën dyshohet se autori kreu krimin”, njofton policia.
Grupi hetimor nën drejtimin e Prokurorisë ndodhet në vendngjarje dhe po punon për zbardhjen e plotë të rrethanave të ngjarjes./Opinion.al
