Është finalizuar operacioni policor antidrogë i koduar “Bishani”, ku janë sekuestruar 30 kilogramë lëndë narkotike e dyshuar cannabis sativa.
Uniformat blu kanë arrestuar në flagrancë 3 shtetasit që transportonin lëndën narkotike, me qëllim shitjen e saj.
“Specialistët e Seksionit për Hetimin e Narkotikëve, në bashkëpunim me “Shqiponjat” dhe Forcat e Posaçme Operacionale në Drejtorinë Vendore të Policisë Vlorë, organizuan dhe finalizuan operacionin policor antidrogë të koduar “Bishani”, në kuadër të të cilit u bë kapja dhe arrestimi në flagrancë i shtetasve:
Aldo Tushaj,34 vjeç, Sokol Beqiraj,29 vjeç, banues në Vlorë dhe shtetasit Alban Velo, 34 vjeç, banues në Bishan, Vlorë.
Shërbimet e Policisë, bazuar në informacionet e marra gjatë operacionit policor, në fshatin Bishan , bënë lokalizimin dhe bllokimin e automjetit me të cilin dyshohej se transportohej lëndë narkotike.
Nga kontrolli fizik i personave të arrestuar dhe i mjetit tip “Ford”, në të cilin ata udhëtonin, u gjet lëndë narkotike e dyshuar cannabis sativa, me peshë 30 kilogramë.
Në bashkëpunim me Prokurorinë vijon puna për identifikimin dhe kapjen e personave të tjerë të implikuar në këtë veprimtari kriminale”-njofton policia.
Materialet i kaluan Prokurorisë, për veprime të mëtejshme, për veprën penale “Prodhimi dhe shitja e lëndëve narkotike”.
