Katër persona janë vënë në pranga dhe një tjetër është shpallur në kërkim si rezultat i një operacioni anti-drogë të zhvilluar në Dibër.
Policia bën me dije se si rezultat i një hetimi tremujor, bazuar në provat e grumbulluara u organizua dhe u finalizua operacioni policor antidrogë i koduar “Eklipsi”, në kuadër të të cilit u arrestuan në flagrancë shtetasit: Diamont Kapxhiu, 21 vjeç; Erlind Nura, 24 vjeç; Ernal Shulku, 40 vjeç dhe Kleo Kaleshi, 36 vjeç. Ndërkohë i shpalluri në kërkim është Tajson Tafa, 23 vjeç.
Këta persona janë arrestuar në flagrancë gjatë operacionit, në një lokal në qytetin e Peshkopisë, ku gjatë kontrollit Policia gjeti dhe sekuestroi një sasi dozash me kokainë dhe 500 doza cannabis sativa që do shpërndahej në doza. Gjithashtu u sekuestruan dy automjetet me të cilat këta shtetas qarkullonin dhe shpërndanin lëndën narkotike, si dhe 8 aparate celular.
Materialet iu referuan Prokurorisë së Rrethit Gjyqësor Dibër, për veprime të mëtejshme, për veprën penale “Prodhimi dhe shitja e narkotikëve” kryer në bashkëpunim.
