Katër persona të cilët dyshohet se rekrutonin gra për ti çuar më pas në parcela me lëndë narkotike, janë arrestuar ditën e sotme në Kruje. Në bazë të një hetimi të zhvilluar nga Prokuroria e qytetit dhe mbi informacionet e Policisë së Shtetit, katër personat siguronin punëtore për kultivimin dhe shitjen e lëndës narkotike cannabis sattiva. Gjatë ndërhyrjes policore është bërë e mundur zbulimi i disa parcelave me rreth 5000 bimë cannabis, si edhe janë arrestuar si persona të dyshuar si organizatorë, Edmond Kadiu, Elton Bababi.
Është arrestuar gjithashtu, shoferi i fugonit që transportonte punëtorët në parcela, Idajet Gashi. Sipas organit të akuzës, të arrestuarit janë të gjithë banorë të Fushë-Krujës.
Në bazë të të dhënave hetimore të deritanishme, rezulton se: Prokuroria e Krujës ka regjistruar për veprën penale “Kultivimi i bimëve narkotike”, kryer në bashkëpunim, parashikuar nga neni 284/2 i K.Penal. Ky procedimi u regjistrua mbi bazën e informacioneve të dërguara nga Policia e Shtetit, të cilat bënin fjalë se shtetasit Edmond Kadiu dhe Elton Babai, banor të Fushë-Krujës kishin financuar mbjelljen e një sasie bimësh narrkotike të llojit canabbis sattiva në zonën që përfshin Njësia Adminstrative Bubq e Bashkisë Krujë.
Nga veprimet hetimore të kryera rezultoi se shtetasit Edmond Kadiu dhe Elton Babai kanë financuar mbjelljen e bimëve narkotike dhe në këtë veprimtari kriminale kanë angazhuar edhe shtetasit Elton Baroka dhe Idajet Gashi.
Këta të fundit sipas porosive të dhëna nga dy organizatorët merreshin me grumbullimin e personave që punonin për përpunimin e lëndës së përfituar nga bimët narkotike. Në këtë kuader, u shoqëruan edhe 16 persona të tjerë, kryesisht gra, të cilat kishin punuar për disa ditë në parcelën ku ishin kultivuar kanabis. Nga pyetja e tyre doli qartë veprimtaria kriminale e personave të arrestuar. Gjatë kontrollit të ushtruar në banesën e shtetasit Edmond Kadiu u sekuestruan 3.000.000 lekë të reja dhe një automjet B.M.V të tipit X6 , po kështu u sekuestrua një automjet tip Benz CLS i prodhimit të viteve të fundit në pronësi të shtetasit Elton Babai, si dhe fugoni që transportonte punëtorët për në parcelat me kanabis. Nga këqyrja e parcelës rezultoi që në të ishin kultivuar mbi 5-6 mijë bimë të tipit kanabis sativa, të cilat ishin në fazën e pjekjes.
