Operacioni Forca e Ligjit i ka dorëzuar kërkesën me shkrim dy personave të tjerë të dënuar më parë nga drejtësia në Gjermani dhe në Belgjikë, për të dorëzuar deklaratën për pasuritë e tyre.
Mësohet se bëhet fjalë për Albert Lame ose (Albert Koschiek), banues në Durrës, i dënuar në Gjermani për vepra penale në fushën e narkotikëve dhe Bardhok Planaj, banues në Koplik, Shkodër, i dënuar në Belgjikë për trafik të qenieve njerëzore.
Albert Lame ose Albert Koschiek është i njohour si koka apo udhëheqësi i “Bandës së bananeve”, Lame së bashku me disa shqiptarë të tjerë transpononin kokainë nga Ekuadori, në kuti bananesh për të furnizuar qytetet gjermane.
Më 2018 një ngarkesë 1.8 ton kokainë u kap në Gjermani e cila vinte nga Ekuadori me vlerë tregu prej 400 milionë euro. Në këtë operacion u përfshinë 500 hetues dhe forca policore gjermane për të arritur në arrestimin e 13 shqiptarëve dhe tre të huajve.
Saktësisht u arrestuan Orneo Margjeka, Emiljan Hysenaj, Dashamir Ndoj, Dario Lame, Ervin Llusha, Izmir Lami, Dolan Kocani, Agim Zeka, Marjan Tola, Mevlan Beca, Granit Bajrami, Artan Mehmeti, Blerim Cakraj si dhe Alberto Kochsiek ose Alberto Lame, Anel Begovic dhe Kofi
Ndërkohë, Bardhok Planaj është personi i radhës i shënjestruar nga OFL për të deklaruar burimin e pasurisë së tij.
Ai u arrestua në vitin 2018 për shkak të një pallati 10 katësh me vlerë 2 milion euro pasi po u konstatua se po e ndërtonte atë pa leje.
Më pas doli se Planaj po e ndërtonte me para të cilat ridhnin nga aktiviteti i tij kriminal i mëparshëm pasi Planaj sipas Policisë është dënuar më parë në Belgjikë në fushën e narkotikëve. Po në 2019 Planajt iu sekuestruan edhe pasuri prona, apartamente, biznese, troje, makina etj.
Emri i Planajt do të lakohej për herë të parë në vitin 2014, gjatë operacionit policor “Laguna e Vilunit”, ku u sekuestruan gati një ton hashash. Shtatë persona u arrestuan, por Planaj arriti t’i shmangej kapjes. Më tetor të 2019 Planaj i cili ishte në arrest shtëpie theu masën e sigurisë por u arrestua më pas në Lushnje.
Të dy këta persona duhet të dorëzojnë deklaratën e pasurisë brenda 48 orëve. Më pas, përgjigjet e marra do t’i dërgohen SPAK-ut, i cili brenda jo më shumë se 15 ditësh, duhet të vlerësojë dosjen e përgatitur nga OFL-ja mbi aktivitetin kriminal të këtyre subjekteve, si edhe pasurinë e tyre.
Sapo të bëjë këtë vlerësim, SPAK-u duhet t’i kërkojë Gjykatës Speciale masën e sekuestrimit për pasuritë e subjekteve dhe pas sekuestrimit dhe në jo më shumë se 6 muaj Gjykata Speciale duhet të vendosë për konfiskimin përfundimtar të tyre./ Opinion.al
