Ditën e sotme Operacioni Forca e Ligjit ka publikuar emrat e dy personave që u janë dërguar kërkesat me shkrim për të justifikuar pasurinë e tyre.
OFL i ka dërguar kërkesë për deklarim pasurie; Plarent Dervishi me banim në Durrës, pasi rezulton në hetim në Gjermani për veprën penale “Trafik i qenieve njerëzore”. Sule Çela me banim në Elbasan, pasi rezulton i dënuar në Itali për trafikim narkotikësh.
Këta persona do të kenë 48 orë kohë për t’iu përgjigut me shkrim të gjitha pyetjeve të OFL. Më pas, përgjigjet e marra do t’i dërgohen SPAK-ut, i cili brenda jo më shumë se 15 ditësh, duhet të vlerësojë dosjen e përgatitur nga OFL-ja mbi aktivitetin kriminal të këtyre subjekteve, si edhe pasurinë e tyre.
Sapo të bëjë këtë vlerësim, SPAK-u duhet t’i kërkojë Gjykatës Speciale masën e sekuestrimit për pasuritë e subjekteve dhe pas sekuestrimit, në jo më shumë se 6 muaj Gjykata Speciale duhet të vendosë për konfiskimin përfundimtar të tyre.
Sipas paketës, “anti-KÇK” të miratuar pak ditë më parë nga qeveria, të gjithë të dënuarit apo të akuzuarit gjatë 30 viteve të fundit, për krimet e parashikuara në këtë ligj, do të kalojnë sitën e provës së ligjshmërisë së pasurisë së tyre./ Opinion.al
