Janë gjetur të pa jetë dy vëllezërit nga Pogradeci të cilët ishin larguar nga banesa e tyre që prej mbrëmjes së datës 7 Dhjetor.
Mësohet se vëllezërit kanë humbur jetën pasi janë qëlluar me armë zjarri. Ata u gjetën në fshatin Zvirinë në afërsi të vendit të quajtur “Kisha e vogël” në Maliq.
Viktimat janë identifikuar me inicialet Andrea Olldashi, 33 vjeç dhe Martin Olldashi, 31 vjeç, banues në Pogradec. Ndërkohë, deri më tani nuk është i qartë motivi i ngjarjes.
Autoritetet, janë duke krehur zonën, ndërsa janë shoqëruar në Polici disa persona për t’u marrë në pyetje nëse kanë dijeni apo jo në lidhje me këtë ngjarje.
Njoftimi i Policisë
Më datë 10.12.2020, rreth orës 11:50, në fshatin Zvirinë, në afërsi të vendit të quajtur “Kisha e vogël”, janë gjetur të pajetë, trupat e vëllezërve A. O., 33 vjeç dhe M. O., 31 vjeç, banues në Pogradec, të cilët dyshohet të kenë humbur jetën si pasojë e përdorimit të armës së zjarrit. Këta shtetas, ishin larguar nga banesa e tyre që prej mbrëmjes së datës 07.12.2020.
Në lidhje me këtë ngjarje menjëherë është ngritur një grup i posaçëm hetimor, me ekspertët më të mirë të Policisë Kriminale të strukturave hetimore në Drejtorinë Vendore të Policisë Korçë, nën drejtimin e Prokurorisë të Rrethit Gjyqësor Korçë.
Forcat Operacionale të DVP Korçë, në bashkëpunim me Komisariatin e Policisë Maliq, janë duke krehur zonën, gjithashtu janë shoqëruar në Polici disa persona për t’u marrë në pyetje nëse kanë dijeni apo jo në lidhje me këtë ngjarje.
Po ndiqet itinerari i lëvizjeve dhe po kryhen një sërë veprimesh hetimore për sqarimin e plotë të rrethanave të kësaj ngjarjeje si edhe kapjen e vënien përpara përgjegjësisë ligjore të autorëve.
