Nesër pritet që parlamenti të mblidhet sërish për të ngritur komisionet Ad-Hoc të Vetingut. Sakaq, Partia Socialiste ka zyrtarizuar dy emrat që do të jenë anëtarë të komisionit, përkatësisht Vasilika Hysi dhe Ulsi Manja, të dy anëtarë të komisionit të ligjeve dhe pjesë e komisionit të reformës. Ndërkohë anëtari i tretë i mazhorancës do të jetë nga LSI-ja, e cila deri më tani nuk ka deklaruar se me kë do përfaqësohet.
Komisioni përbëhet nga gjithsej 6 anëtarë, 3 opozitë, 3 mazhorancë. Ky komision do jetë ai që do zgjedhë 27 anëtarët e organeve të vetingut. Por duke qenë se PD është në bojkot, atëherë ngritja e komisionit është e pamundur. Por çfarë sjell kjo? Vetingu është procesi kyç i reformës në drejtësi. Nëse nuk ngrihet komisioni Ad Hoc, nuk bëhet dot verifikimi i gjyqtarëve dhe i prokurorëve. Po ashtu nuk ngrihen dot Këshilli i Lartë i Prokurorisë dhe Këshilli i Lartë Gjyqësor.
