Gjashtë shqiptarë, klandestinë që po përpiqeshin të hynin në mënyrë të paligjshme në Kanada, janë arrestuar nga Policia Federale në Portin brazilian të Suape, në qytetin Ipojuca këtë të mërkurë.
Mediat braziliane kanë publikuar edhe emrat e shqiptarëve të arrestuar. Ata janë: Ledion Taka, 37-vjeç, Permet Behluli, 25-vjeç, Shaqir Serjani, 28-vjeç, Adnandi Feka, 34-vjeç, Rezart Kruja, 27-vjeç dhe Erin Fekollari, 26-vjeç.
Sipas burimeve zyrtare policore, mësohet se ata ishin fshehur në kontenierët e një anije gjermane e cila ishte nisur nga Franca dhe synonte Kanadanë.
Shqiptarët kanë deklaruar para policisë pas arrestimit se kërkonin të shkonin në Kanada për punë.
Nga deklarimet e të arrestuarve, mësohet se ata kishin hipur në anije në qytetin e Fos-sur-Mer, Francë, më 23 shtator, duke kërcyer një gardh deri në shkallët ku qëndronin të fshehur për katër ditë me rradhë në mes të kontejnerëve.
Por u zbuluan më 27 shtator nga ekuipazhi i anijes, gjatë kalimit nga Spanja në Brazil, kur ushqimi u kishte mbaruar dhe vendosën të shkojnë në kuzhinën e anijes, ku edhe u diktuan.
Shqiptarët do të kthehen sërish në Shqipëri, teksa aktualisht po mbahen në një hotel në Recife.
Burimi: Panorama online
