Policia e Shtetit ka publikuar sot emrat dhe fotografitë e tre personave të dënuar me burg përjetë dhe që i shtohen listës së 50 më të kërkuarve në Shqipëri.
Sokrat Ruda, Jani Alia, Artur Kuliçi, janë të dënuar në mungesë me burgim të përjetshëm për vrasje dhe vepra të tjera penale.
Konkretisht, Sokrat Ruda është dënuar me burgim të përjetshëm nga Gjykata e Vlorës, për “Vrasja me paramendim” dhe “Armëmbajtja pa leje” pasi në datën 8 qershor të vitit 1995, ka vrarë me armë zjarri për motive të dobëta xhelozie shtetasin Z. D në lagjen “Isa Boletini”.
Jani Alia, është dënuar me burgim të përjetshëm nga Gjykata e Shkallës së Parë Tiranë, për veprën penale “Vrasja me paramendim” pasi ka vrarë me armë zjarri shtetasin E.Ç në një lokal në Tiranë më 1 maj të vitit 2016.
Artur Kuliçi është dënuar me burgim të përjetshëm nga Gjykatës e Rrethit Gjyqësor Tiranë, për veprat penale “Vrasja në rrethana të tjera cilësuese” dhe “Armëmbajtja pa leje”.
Në datën 6 mars 2013, në një lokal nate në Tiranë, Kuliçi, pas një konflikti me disa persona të tjerë, ka qëlluar me armë zjarri duke rrezikuar jetën e disa personave dhe si pasojë ka mbetur e vrarë me armë zjarri shtetasja S. T.
