Policia ka dhënë detaje për ngjarjen e rëndë të ndodhur sot në mesditë në Kavajë, ku pas konfliktit me armë zjarri midis disa personave, mbeti i vrarë një kalimtar i rastit, shtetasi Ramazan Hasalliu.
Sipas policisë autorë të dyshuar janë Marius Aliu dhe Denis Aliu. I pari ka mbetur i plagosur dhe mbahet në ruajtje nga shërbimet e Policisë në spitalin e Durrësit, ndërsa i dyti është shpallur në kërkim pasi ka mundur të largohet nga vendngjarja.
Katër shtetas të tjerë që kanë mbetur të plagosur dhe ndodhen në spitalin e Durrësit jashtë rrezikut për jetën. Ata janë identifikuar si Erald Hyka, Rustem Berberi, Sali Mekja dhe Arben Hajdini.
Sa i përket konfliktit, sherri ka nisur mes Erald Hykës dhe Denis Alisë, paraditen e së enjtes, e më pas dy të rinjtë kanë marrë armët e kanë hapur zjarr ndaj njëri-tjetrit.
Autoritetet policore kanë bllokuar dy automjete që u përkasin personave të përfshirë në konflikt. Ndërkohë në komisariatin e Kavajës janë shoqëruar disa persona dhe vijon puna për shoqërimin e personave të tjerë. Grupi hetimor po punon për zbardhjen e plotë të rrethanave të ngjarjes./ Opinion.al
