Policia ka vënë në pranga 2 shtetas në kërkim, të dënuar me vendim të formës së prerë nga Gjykata.
Njëri nga të arrestuarit është Vullnet Lelaj, 38 vjeç, banues në fshatin Mesaplik, Selenicë.
Ky shtetas është dënuar me 6 vite burg, për veprën penale “Moskallëzim krimi, kryer në bashkëpunim”, në lidhje me ngjarjen e ndodhur në korrik të vitit 2016, në fshatin Vranisht, ku për motive të paqarta mbeti i vrarë një 20-vjeçar nga Librazhdi. Ai u kap duke udhëtuar me automjetin e tij në fshatin Ploç të Selenicës dhe është dënuar nga Gjykata edhe për veprën penale “Kultivimi i bimëve narkotike” kryer në bashkëpunim.
I arrestuari tjetër është Ergest Sina, 29 vjeç, banues në Vlorë.
Ai ishte shpallur në kërkim, sepse Gjykata e ka dënuar me 2 vite burg, për veprën penale “Armëmbajtja pa leje”, për ngjarjen e ndodhur në janar të vitit 2016, në zonën e Skelës, pasi dyshohet se në bashkëpunim me një tjetër, ka qëlluar me armë zjarri në ajër.
Ditën e djeshme, pas kapjes së këtij shtetasi është ushtruar kontroll në banesën e tij në lagjen “24 Maji” Vlorë, ku janë gjetur dhe sekuestruar një sasi municioni luftarak (72 fishekë) dhe 1700 fara të dyshuara si cannabis sativa.
Materialet iu referuan Prokurorisë, për veprime të mëtejshme. /Opinion.al
