Sokol Berberi nuk ka hequr dorë. Ai e ka sërish emrin në listën e kandidatëve të qeverisë për pozicionin e gjyqtarit në Strasburg. Kujtojmë se ish-anëtari i Gjykatës Kushtetuese, Sokol Berberi është refuzuar tre herë nga Asambleja Parlamentare e Këshillit të Evropës.
Lista me 17 emrat e juristëve që janë në garë për këtë post është publikuar në faqen e kryeministrisë ku ndër të tjera thuhet se ata do ti nënshtrohen vetingut. Vetëm 3 emra do zgjedhë Qeveria nga lista me 17 kandidatë. Mandej mes 3 emrave, Asambleja zgjedh 1 gjyqtar për në GJEDNJ.
Kujtojmë se Këshilli i Europës i ka kërkuar prej dy vitesh qeverisë shqiptare të paraqesë listën me propozime për tri kandidaturat më të përshtatshme për pozicionin e gjyqtarit të ri të Shqipërisë në GJEDNJ. Të gjithë emrat e dërguar më heret nga qeveria shqiptare janë rrëzuar, mes tyre Sokol Berberi, Ina Rama, Aurela Anastasi, etj.
Më poshtë njoftimi i plotë i Kryeministrisë mbi kandidatët e rinj
Në kuadër të procesit për zgjedhjen e gjyqtarit të ri të Shqipërisë në Gjykatën Evropiane të të Drejtave të Njeriut, Këshilli i Evropës i ka kërkuar qeverisë shqiptare të paraqesë listën me propozime për tri kandidaturat më të përshtatshme për këtë pozicion.
Altina Xhoxhaj
Arben Braçe
Asllan Karaj
Darian Pavli
Darjel Sina
Elira Kokona
Genci Bilali
Jonela Kita
Marjana Semini
Oriona Muçollari
Përparim Kalo
Rezarta Tahiraj
Sinan Tafaj
Sokol Berberi
Sokol Hasani
Sonila Bejtja
Suzana Frashëri
Siç është komunikuar edhe në njoftimin për aplikim: Duke marrë në konsideratë rëndësinë e integritetit profesional e moral, si dhe pastërtinë e figurës së gjyqtarëve dhe prokurorëve në sistemin e drejtësisë shqiptare, por edhe të përfaqësuesve shqiptarë në trupat ndërkombëtare gjyqësore, në përputhje me Kushtetutën dhe legjislacionin në fuqi, aplikantët për kandidat për pozicionin e gjyqtarit të ri të Shqipërisë në GJEDNJ do t’i nënshtrohen procesit të rivlerësimit kalimtar (Vetting-ut), si më poshtë:
Aplikantët për pozicionin e gjyqtarit në GJEDNJ, që mbajnë funksionet e parashikuara nga pikat 3 e 4 (fjalia e parë), të nenit 179/b, të Kushtetutës, rivlerësohen ex officio, nga institucionet e rivlerësimit;
Aplikantët për pozicionin e gjyqtarit në GJEDNJ, që vijnë nga radhët e ish-gjyqtarëve, ish-prokurorëve, ish-këshilltarëve ligjorë të Gjykatës Kushtetuese dhe të Gjykatës së Lartë, të cilët kanë punuar në këto pozicione të paktën tre vjet, do t’i nënshtrohen parimeve të pikës 3, të këtij njoftimi. Por, nëse dëshirojnë, mund të rivlerësohen nga institucionet e rivlerësimit, në përputhje me pikën 4 (fjalia e dytë), të nenit 179/b, të Kushtetutës;
Aplikantët e tjerë, profesionistë të së drejtës, që nuk përfshihen në kategoritë e përmendura në pikat 1 e 2, do t’u nënshtrohen parimeve që qëndrojnë në themel të procesit të rivlerësimit (Vetting-ut), të cilat lidhen me çështje të vlerësimit të pasurisë, kontrollit të figurës dhe të vlerësimit profesional, në bashkëpunim me institucionet përgjegjëse.
Pas përfundimit të këtij procesi si dhe vlerësimit të dosjeve të aplikimit, aplikantët do të njoftohen për kryerjen e intervistës.
/Opinion.al
