Thomas Strakosha është një miksim mes zhgënjimit dhe sodisfaksionit në përfundim të ndeshjes së djeshme.
Portieri shqiptar i skuadrës së Lacios, djali i legjendës së portës së Kombëtares sonë, Foto Strakosha, bëri debutimin e tij në Serinë A, në “San Siro”, kundër Milanit, duel pas të cilit ai del me dy gola të pësuar, por ndoshta më shumë sesa 21vjeçari, ishin shokët e tij ata që nuk e ndihmuan për të shmangur disfatën.
“Jam tepër i lumtur për debutimin, por kundër Milanit ai që vlente më shumë ishte rezultati. Prandaj në këtë aspekt jam tepër i zhgënjyer. Falënderoj trajnerin Simone Inzagi dhe klubin që besuan tek unë në këtë ndeshje të rëndësishme.
Për mua kjo ishte një ndeshje me shumë emocione, por kur humbet nuk të mbetet asgjë e mirë brenda, ndonëse ne duhet të vazhdojmë të punojmë dhe të shohim përpara. Si dilet nga kjo humbje?
Kemi një trajner që na ushqen shumë dëshirë për të luftuar dhe për të luajtur bukur njëkohësisht, por edhe nëse gabuam shumë kundër Milanit, mbetemi një skuadër e madhe. A fola me familjen përpara ndeshjes?
Po, pa dyshim… Ishin të gjithë vërtet të lumtur. Babai im ishte edhe më i stresuar sesa unë për debutimin tim, ndoshta më i stresuar se kur luante vetë në fushën e lojës.
