Presidenti francez Emmanuel Macron i ka drejtuar një letër qytetarëve evropianë ku ka paraqitur një sërë propozimesh për vendet evropiane. “Ka ardhur koha për një Rilindje të re Europiane”,-shkruhet në letrën e ndarë në tre kapituj ku përfshihen tema si “Mbrojtja e lirisë”, “mbrojtja e kontinentit” dhe rigjetja e shpirtit të progresit.
Macron ka propozuar një rishikim total të hapësirës Schengen në mënyrë që të rivendoset siguria, përfshirë edhe një ‘Polici kufitare’ dhe gjithashtu një ‘Zyrë Europiane Azili’ duke përfshirë detyrime të rrepta kontrolli dhe solidaritet në të cilin secili shtet do të duhet të kontribuojë.
Në këtë letër, e cila publikohet në gazetat e 28 vendeve të BE-së vetëm pak muaj përpara zgjedhjeve të parlamentit evropian më 26 maj, propozohet gjithashtu krijimi i një ‘Këshilli Sigurimi të BE-së’ me Mbretërinë e Bashkuar për marrjen e vendimeve të përbashkëta të Bashkimit Europian në fushën e mbrojtjes si dhe një mburojë sociale për punëtorët dhe një pagë minimale europiane.
Në propozimet e tij presidenti francez ka përfshirë edhe fushën e kontrollit të ushqimit. Sipas tij duhet të ngrihet ‘Forca Sanitare Europiane’ që të forcojë kontrollet e ushqimeve, si dhe të përgjysmohet përdorimi të pesticideve deri në vitin 2025. Mes propozimeve të Macron është edhe krijimi i një Banke Europiane për klimën me objektivin për të financuar tranzicionin ekologjik në Europë./Xh.K/Opinion.al/
