Ministria e Brendshme italiane ka ftuar agjencinë e OKB-së për Refugjatët (UNHCR), për të mbikëqyrur zbatimin e Protokollit dhe për të garantuar të drejtat e njeriut në dy qendrat e emigrantëve në Shqipëri.
Edhe pse UNHCR nuk ka qenë pjesë e negociatave që janë zhvilluar për hartimin dhe zbatimin e protokollit, qeveria Meloni u ka dhënë informacion të detajuar, si dhe u ka konfirmuar zyrtarëve të Kombeve të Bashkuara dëshirën e saj të fortë që kjo të jetë në përputhje me ligjin dhe standardet ndërkombëtare.
Në bazë të një shkëmbimi letrash me Ministrinë e Brendshme italiane, Agjencia e OKB-së për Refugjatët do të luajë një rol monitorues dhe këshillues që t’u garantohet e drejta për kërkimin e azilit.
Misioni monitories i UNHRC-së fillimisht do të zgjasë 3 muaj dhe pas kësaj periudhe do t’i vërë në dispozicion rekomandimet e saj dy qeverive dhe aktorëve të tjerë të interesuar.
Në 20 Gusht pritet të kryhet kolaudimi i parë i funksionimit të qendrave të ngritura në Shëngjin e Gjadër ku do të mbërrijnë 500 trupa të policisë italiane dhe 15 policë të burgjeve për të qenë gati për mbërritjen e azilkërkuesve afrikanë.
