Partia Demokratike ka reaguar për emërimin e ish-kreut të Komisionit të Ligjeve, Ulsi Manja, në krye të Ministrisë së Drejtësisë.
Në një postim në rrjetet sociale, teksa ka publikuar një fragment nga përgjimi i Bild për zgjedhjet në Dibër, deputeti i zgjedhur i PD-së Enkelejd Alibeaj shkruan se zgjedhja e Ulsi Manjës në një nga ministritë më të rëndësishme cënon edhe më shumë besimin tek institucionet kur ato dorëzohen tek individë që duhet të ishin përpara drejtësisë e jo në krye të saj.
“Emërimi i Ulsi Manjës si Ministër Drejtësie, është një provokim ndaj shoqërisë shqiptare. Qytetarët tanë dhe bota mbarë ia njeh krimet që ka kryer në bashkëpunim me Edi Ramën. Caktimi në krye të Drejtësisë të një prej simboleve të pandëshkueshmërisë së krimeve elektorale të Dosjes 184, është një shembull negativ që cënon edhe më shumë besimin tek institucionet kur ato dorëzohen tek individë që duhet të ishin përpara drejtësisë e jo në krye të saj. Ky është një tjetër ilustrim kuptimplotë se si masakra zgjedhore nuk zgjidhi asgjë për qytetarët. Përkundrazi, vota e vjedhur përdoret si imunitet për krimet e shkuara dhe ato të reja në dëm të Shqipërisë dhe shqiptarëve”, shkruan Alibeaj./Opinion.al
