Kryesore

Emërimi i Artur Metanit/ PD: Antikushtetues, ka mbajtur funksion politik


               Publikuar në : 12:14 - 21/01/20 |
Al Do

Partia Demokratike e ka cilësuar antikushtetues emërimin e Artur Metanit si drejtues të Inspektoriatit të Lartë të Drejtësisë.

Në një deklaratë për mediat, Sekretari për çështjet ligjore, Clirim Gjata deklaroi se emërimi i Metanit bie në kundërshtim me Kushtetutën pasi sipas nenit 147/d, “Kandidati për Inspektor të Lartë të Drejtësisë nuk duhet të ketë mbajtur funksione politike në administratën publike gjatë 10 vjetëve të fundit përpara kandidimit”.

Po ashtu, ligji për organet e qeverisjes së sistemit të drejtësisë, në nenin 199, parashikon se: “Inspektor i Lartë i Drejtësisë mund të zgjidhet shtetasi shqiptar, që në momentin e kandidimit përmbush këto kushte:

dh) nuk ka mbajtur funksione politike në administratën publike ose pozicione drejtuese në parti politike gjatë 10 vjetëve të fundit përpara kandidimit;

Artur Metani është në kushtet e ndalimit kushtetues dhe ligjor. Ai ka mbajtur funksionin e Këshilltarit Juridik të Presidentit të Republikës, në periudhën Maj 2002-Korrik 2012.

Në bazë të Ligjit të Vetingut, nenin 3 pika17, pozicioni i Këshilltarit të Presidentit konsiderohet “funksion politik” në administratën publike”, tha Gjata.

Ai akuzoi drejtpërdrejtë KED, Kryeministrin Rama dhe Parlamentin se kanë shkelur me vetëdije Kushtetutën.

Kjo është shkelja më e rëndë nga Parlamenti në emërimin e Artur Metanit”, tha Gjata teksa shtoi se ky emërim është bërë në funksion të kryeministrit Rama pasi Inspektori i Lartë i Drejtësisë “ka si kompetencë të kontrollojë punën e gjykatësve dhe të prokurorëve të Republikës dhe t’i propozoje sipas rastit KLP dhe KLGJ masat disiplinore deri në shkarkim nga detyra. Kështu Edi Rama ka në dorë gjyqësorin dhe prokurorët, të cilët po nuk zbatuan urdhrat e tij, u lëshon Inspektorin, pra Metanin”, deklaroi ai. /Opinion.al

Pas