Në prezantimin e projekt-ligjit të ri për mbrojtjen civile kryeministri Edi Rama tha se planet e emergjencave tashmë janë të detyrueshme për të gjithë institucionet, në të kundërt ata do të përballen me masat ndëshkimore që përmban ligji i ri. Rama nuk kurseu gjithashtu kritikat për bashkitë duke i cilësuara sjelljet e tyre të papërgjegjshme në lidhje me marrjen e masave për situatat emergjente.
Projekt ligji që u prezantua sot përcakton qartë të gjitha përgjegjësitë dhe masat që duhen të merren në rastet e fatkeqësive natyrore. Kryeministri Rama si fillim vuri theksin në marrjen e masave për parandalimin e dëmeve të emergjencave dhe jo kur ato shfaqen.
“Këtu sfida mbetet e përditshme jo momenti kur emergjenca shfaqet. E përditshme si një përpjeke e vazhdueshme për parandalimin, për prekjen dhe kurimin e te gjitha pikave te dobëta dhe lidhjen e te gjitha hallkave te një zinxhiri qe duhet te na garantojë uljen e vazhdueshme te riskut” u shpreh Rama.
Ne projekt ligjin e ri parashikohen dhe masa ndëshkimore për te gjithë institucionet qofshin shtetërore apo private, qe nuk kane një plan te emergjencave.
Projekt-ligji i ri parashikon masa ndëshkimore për subjektet shtetërore dhe private të cilat nuk kanë një plan të masave për rastet e emergjencave. “Planet për Emergjencat civile do te jene tashme te detyrueshme edhe për institucionet shtetërore edhe për subjektet private ne sektorët e shëndetësisë, arsimit, turizmit, mjedisit dhe kjo do te lidhet me sanksione te qarta për çdo institucion apo subjekt privat” tha Rama në lidhje me sanksionet.
Një tjetër moment i fjalës së kryeministrit ishte kur ai kritikoi bashkitë të cilat nuk duhet të sillen si një pronar lokali dasmash me njësitë që administrojnë.
“Nuk mund dot qe njësitë e qeverisjes vendore te jene te pavëmendshme dhe jo vetëm te pavëmendshme por nga njëherë edhe te papërgjegjshme njësoj si je pronar i një lokali dasmash” tha ndër të tjera kryeministri. /Opinion.al
