Ka kohë që përflitet për një lidhje të mundshme mes tyre, por edhe pse shfaqen kudo bashkë në koncerte, ata kurrë nuk e kanë pranuar se janë çift të dashuruarish.
Por, para pak ditësh, disa portale shkruanin se Elvana Gjata dhe Flori Mumajesi në të vërtetë janë dy miq që ndajnë të njëjtën dhomë, duke iu referuar rrëfimit të një prej organizatorëve të koncerteve, që i është dashur të bëjë rezervimin e dhomës së hotelit ku artistët do të akomodoheshin.
Menaxheri, i cili nuk ka pranuar të japë detaje më shumë, ka pohuar se këngëtarët më të pëlqyer të momentit nuk i kërkuan dy dhoma, por një të vetme, për të kaluar natën. Deri tani në rrjetet sociale apo intervista të ndryshe, ata i kanë shprehur njëri–tjetrit dashurinë në mënyrën e tyre, por duke i dhënë ngjyrat e miqësisë dhe bashkëpunimit.
Ndërkohë, “Panorama Plus” duke iu referuar burimeve pranë çiftit shkruan sot ata kanë treguar se në fakt gjërat mes tyre po shkojnë drejt zyrtarizmit, që do të thotë se Flori dhe Elvana nuk janë thjesht kolegë, pasi po i afrohen momentit që ta bëjnë publike këtë histori suksesi në muzikë, pas së cilit fshihet një histori e fortë mes tyre.
Tashmë Flori ndihet më pranë familjes së Elvanës, pasi në shoqërinë apo udhëtimet e tyre është parë edhe motra e këngëtares.
Për më tepër, kjo lidhje i ka rrënjët pak më të thella sesa thjesht një ndjenjë mes tyre. Fakt i rëndësishëm që po e projektojnë të ardhmen bashkë janë dhe bizneset që kanë ngritur bashkë, në një prej të cilave janë ortakë zyrtarisht.
Edhe pse janë përpjekur t’i mbajnë të fshehta bizneset e shumta që kanë, në media ka mundur të dalë vetëm maja e ajsbergut të tyre.
Duket se fitimet e shumta nga muzika, duke pasur parasysh faktin që kanë axhendë shumë të ngjeshur me koncerte, ata kanë vendosur t’i investojnë në biznese të tjera fitimprurëse.
Këngëtarja e njohur Elvana Gjata ka vendosur të shfrytëzojë emrin e saj, që e ka ndërtuar me shumë vite karrierë, për të hapur një biznes privat, të cilin e ka regjistruar pranë QKRsë në emrin e saj./ Panorama.al
