Mbrojtësi i Shqipërisë, Elseid Hysaj, është bërë biond. Në një botë normale, ky nuk duhej të përbënte ndonjë lajm për të vënë duart në kokë, por në rrjetet sociale gjithçka mund të fitojë pak bujë ose gallatë, në varësi të çfarëdolloj mendjeje “djallëzore”.
Në Itali duket se janë habitur shumë nga pamja e re e lojtarit të Napolit, aq sa në rrjetet sociale çdo minutë po publikohen montazhe tallëse, gjithmonë në dozën e lejueshme të humorit.
Për shembull, a ju ka shkuar ndërmend që shkodrani mund të ngjajë si e famshmja Marilyn Monroe?
Nëse jo, krahasimi me personazhin e Gokut në filmin vizatimor “Sferat e dragoit” mund të jetë më i pranueshëm. Në fund të fundit, gjysma e djemve shqiptarë prej tij mësuan italishten!
