Znj. Gjebrea nuk jemi sqaruar: A ka qenë i dënuar bashkëshorti juaj dhe çfarë lidhje keni me Habilajt?!
Ish-zv.ministrja e Brendshme Elona Gjebrea, aktualisht deputete e PS ka bërë një sprovë për të na sqaruar përmes një statusi në facebook lidhur me pozitat e saj tashmë që rezulton në dosjen e prokurorisë se ka udhëtuar me Tahirin në makinën e famshme të Habilajve Audi 003.
Sakaq, mbrëmjen e sotme Opinion.al publikoi një investigim sipas të cilit, bashkëshorti i saj, Arian Hoxha ka qenë i dënuar për falsifikim dokumentesh.
Ai ka mashtruar institucionet pasi nuk e ka deklaruar këtë fakt në formularin e vetëdeklarimit në sajë të ligjit të Dekriminalizimit.
Znj. Gjebrea në sqarimin e saj thotë se këto janë sulme të Lulzim Bashës. “Nuk kam bërë asgjë të paligjshme si zv.ministre. Sulmet e opozitës, janë një përpjekje e dështuar për të njollosur figurën time, duke hedhur në tregun mediatik mashtrime dhe të pavërteta”, shprehet Gjebrea.
Znj. Gjebrea, pyetja që shtron media në emër të publikut që të ka votuar është: A keni udhëtuar ju nga Greqia në Shqipëria me Audi 003 kur ky mjet përdorej nga Habilajt siç rezulton në sistemin TIMS?
Znj. Gjebrea, po bashkëshorti juaj, kur ishte punonjës shteti a e ka fshehur dënimin?
Ju deklaroni se garantoni pastërtinë e figurës, por faktet janë më kokëforta se hartimet për ndjeshmërinë e votuesve tuaj në Njësinë Bashkiake 1 në Tiranë./Opinion.al
Statusi i plotë
Sqarim:
Asgjë të paligjshme apo të pamoralshme nuk ka në punën time 4-vjeçare si Zv.Ministre e Punëve të Brendshme edhe sot si deputete e Kuvendit të Shqipërisë. Por dhe gjate gjithe jetes dhe karrieres time.
Miq dhe dashamirës, votues të Njësisë bashkiake nr.1 në Tiranë, bashkëpunëtorë dhe mbështetës të Partisë Socialiste, në respekt të ndjeshmërisë së krijuar për shkak të sulmeve të fundit që më janë bërë nga opozita e Lulzim Bashes, e ndiej për detyrë morale t’ju siguroj se i gjithë aktiviteti im institucional, ashtu sikurse edhe jeta personale e familjare kanë qene dhe mbeten të bazuara te përgjegjshmëria ligjore dhe morale.
Sulmet e opozitës, janë një përpjekje e dështuar për të njollosur figurën time, duke hedhur në tregun mediatik mashtrime dhe të pavërteta.
Sigurisht ne momentin e duhur keta baltoses e shpifes qe guxojne te hedhin balte e shpifje mbi figuren time do te perballen sipas ligjit.
Ashtu siç e kam shprehur publikisht, kam qenë dhe mbetem e hapur për t’u hetuar nga të gjitha organet ligjzbatuese.
Deri më sot asnjë thirrje nuk më ka ardhur nga organi i prokurorisë, siç është pretenduar nga disa media.
Duke falenderuar të gjithë miqtë dhe dashamirësit që më kanë shkruar apo telefonuar këto ditë duke më shprehur mbështetjen e tyre, edhe një herë dua t’i garantoj për pastërtinë e figures time.
