Aktorja e njohur me origjinë shqiptare Eliza Dushku është në pritje të ëmbël. Lajmi është konfirmuar nga vetë aktorja për të përditshmen US Weekly.
Dushku, e cila është lidhur në martesë në gusht të vitit 2018 me CEO-n 54-vjeçar Peter Palandjian është shprehur e emocionuar dhe e ngazëllyer për vogëlushin ose vogëlushen që pritet të vijë në jetë së shpejti.
“Jemi shumë të lumtur. Ne u lidhëm në martesë gjatë muajit gusht. Është një vit shumë i veçantë për ne,”-thekson Eliza për US Weekly.
Aktorja 38-vjeçare është shprehur gjithashtu se ndihet mjaft e realizuar sa i përket jetës së saj deri në këto momente.
“Kam qenë mjaft e lumtur për atë çfarë kam bërë me jetën time deri tani. Kam jetuar në Boston. Jam duke kryer studimet në lidhje me kurimin dhe shërimin e personave që kanë pasur probleme me trauma të ndryshme. Jam e sapomartuar dhe jam kaq entuziaste për këtë kapitull të ri në jetën time. Kam aktruar që në moshën 9-vjeçare dhe jam duke parë për gjëra të reja për të cilat jam shumë e lumtur. Ka qenë një vit i mrekullueshëm,”-përfundon Dushku.
Aktorja e njohur për rolet e saj në serile si “True Calling” apo “Buffy the vampire slayer”, u lidh në martesë në gusht të vitit që lamë pas në një ceremoni martesore mjaft diskrete, fotot e së cilës u publikuan prej saj në rrjete sociale. Xh.K
