Elbasani mban i vetëm kreun e klasifikimit në Kategorinë e Dytë, kur mbetet për t’u luajtur edhe një fazë deri në përfundim të saj. Ngjitja në të Parën nuk duket një mision i pamundur dhe nëse vazhdohet me këtë ritëm, elbasanasit do të jenë thjesht kalimtarë në të Dytën. “Panorama Sport” jep 5 arsyet e ringritjes së Elbasanit.
-Ruajtja e një boshti të skuadrës nga edicioni i kaluar, teksa, edhe pse skuadra ra në Kategorinë e Dytë, disa elementë preferuan të mos largoheshin, por të qëndronin në Elbasan. Përpos këtyre, edhe ato pak afrime që u bënë në merkato, kanë rezultuar efikase deri më tani.
-Korrektësia me pagesat ka qenë determinante deri në këto momente. Elbasani vinte pas një krize financiare prej disa vitesh dhe me ardhjen e pronarëve të rinj, lojtarët kanë marrë pagesat e tyre. Edhe pse nuk bëhet fjalë për shuma të mëdha, lojtarët janë shlyer për kontratat që kanë nënshkruar.
-Harmonia në skuadër nuk ka munguar gjatë kësaj periudhe dhe për ta përforcuar këtë kanë menduar edhe vetë trajnerët që të stërviten së bashku me skuadrën. Përpos Dalipit edhe Kotorrit që janë edhe lojtarë, shpeshherë edhe vetë tekniku Merxha nuk nguron që të bëjë të njëjtat ushtrime që jep për futbollistët.
-Të mos humbësh asnjë ndeshje nuk është asnjëherë e lehtë, në cilëndo kategori të marrësh pjesë. Elbasani ia ka dalë të mos dalë asnjëherë pa pikë nga një sfidë kampionati dhe kjo gjë ka rritur optimizmin dhe besimin te futbollistët. Shpresohet që kjo ecuri të vijojë edhe pas pushimeve.
-Fati është me të mëdhatë, thuhet shpesh në futboll. Në këtë kategori Elbasani është një skuadër e madhe në krahasim me të tjerat dhe fati u ka buzëqeshur. Mjafton të kujtojmë përjashtimin e Këlcyrës nga kampionati, çka u dha mundësinë verdhebluve të jenë të vetëm në krye të klasifikimit.
