Prokuroria ka arritur një akt-marrëveshje me ekzekutorin e komisar Artan Çukut, Mikel Shallarin, i cili ka rrefyer porositësin e vrasjes dhe ka përfituar statusin e të penduarit të drejtësisë.
Akt-marrëveshja është pranuar sot në gjykatë. Po kështu dakord ka qenë edhe avokati i familjes Çuku. Prokurori i Krimeve të Rënda, Henrik Ligori, paraqiti në Gjykatë aktmarrëveshjen ku kerkohej dënimi me 10 vite burg i Shallarit. Kërkesa për gjykim ndaj Mikel Shallarit, Bledar Jambellit e Kristaq Lecit është duke u shqyrtuar nga gjyqtarja Miliana Muça. Mikel Shallari duke treguar porositësit i shpëton burgut përjetë dhe dënohet vetem me 10 vite burg.
Ndërsa dy personat e tjerë, Bledar Jambelli, në rolin e porositësit dhe kushëriri i Shallarit, Kristaq Leci në rolin e ndërmjetësit, të cilët janë të shpallur në kërkim ndërkombëtar, do të gjykohen në mungesë.
Për tre të dyshuarit, më datë 12 qershor 2017, Gjykata e Krimeve të Rënda ka caktuar masën e sigurisë “arrest me burg” për veprën penale “Vrasje e punonjësit të Policisë së Shtetit”, në bashkëpunim, parashikuar nga neni 79/b të Kodit Penal.
DESHMIA E SHALLARIT
Mikel Shallari, personi që u arrestua vitin e kaluar si i dyshuar për vrasjen e Artan Cukut, gjatë deklarimeve që ka dhënë para hetuesve ka treguar detajet e planit për kryerjen e vrasjes. Ai ka treguar se porositësin për vrasjen e Artan Cukut e kishte takuar përmes kushëririt të tij, i cili kishte thënë se po kërkonin dikë që nuk kishte probleme me ligjin dhe që të mos gjendej lehtë.
Për takimin me porositësin, Shallari ka rrëfyer se pasi ishin ulur në një lokal, ai e kishte urdhëruar mos ta shikonte në fytyrë. “Do të vras po ma përmende emrin. Mbaroje këtë punë”, i kishte dhënë urdhër porositësi.
Në vijim të planit, sipas Mikel Shallarit, atij i ishin dhënë 3500 euro parapagim dhe shuma prej 15 mijë eurosh kur të mbaronte porosinë. Në rrëfimin e tij, Shallari kujton se i ishin dhënë dy pistoleta dhe një makinë.
Sipas grupit hetimor, në vrasjen e ish-drejtorit të Policisë së Vlorës, Artan Cuku, janë përfshirë 3 persona. Personi që kreu ekzekutimin e Cukut mbrëmjen e 8 prillit 2017 është Mikel Shallari, i cili ndodhet në paraburgim. Ndërsa Policia ka shpallur në kërkim dy persona të tjerë.
Njëri në rolin e porositësit dhe tjetri në rolin e ndërmjetësit e bashkëpunëtorit. Ky i fundit është kushëriri i Mikel Shallarit, ndërsa porositësi është 38-vjeçari nga Bledar Jambelli. Sipas të dhënave të Policisë, të dy këta persona ndodhen jashtë Shqipërisë. Për arrestimin e Bledar Jambellit janë kryer disa verifikime në Gjermani, por nga të dhënat e siguruara në rrugë operative është mësuar se ai lëviz herë pas here mes Gjermanisë dhe Spanjës, raporton “Panorama”.
