Një shqiptar është ekzekutuar me armë zjarri pranë banesës së tij në Rejkjavik të Islandës, mbrëmjen e së shtunës. Ai sapo kishte parkuar makinën dhe po hynte në shtëpi në orën 23:57 kur ndodhi ngjarja. Autori i kishte bërë pritë në prag të shtëpisë duke e qëlluar disa herë.
Lajmi bëhet i ditur nga mediat vendase, që ndonëse nuk japin detaje mbi identitetin e tij, thonë se viktima është një 40-vjeçar shqiptar, që ka lënë pas gruan shtatzënë dhe një fëmijë të vogël, që ndodheshin në banesë në momentin e krimit.
Për vrasjen janë arrestuar deri tani tre persona, një islandez dhe dy të huaj. Dyshohet se i lidhur me ngjarjen është edhe një person i katërt që ndodhet në paraburgim, i arrestuar disa ditë më parë.
Pista e parë ku po hetohet lidhet me prishjen e pazareve, ndërsa dyshohet se shqiptari ishte i lidhur me botën e krimit në Islandë./Opinion.al
