Një 36-vjeçar shqiptar në Angli është vrarë mbrëmjen e Krishtlindjes në sy te familjes së tij. Sipas BBC 36-vjeçari Flamur Beqiri, i cili njihej edhe me emrin Alex u qëllua për vdekje teksa po kthehej në shtëpinë e tij në Battersea të Londrës.
Flamur Beqiri ishte vëllai i personazhit të njohur në Britani si modele Misse Beqiri. Mediat britanike kanë shkruar se fqinjët e 36-vjeçarit kanë dëgjuar të shtënat me armë, të cilat sipas tyre ishin 8 ose 10 të tilla dhe më pas bashkëshorten e tij, e cila bërtiste për ndihmë.
“Dëgjova ulërimat e gruas së tij. Dola dhe pashë se ishte një nga fqinjët e mi. Ai ishte shtrirë përpara derës së shtëpisë i mbuluar nga gjaku”,-u shpreh një fqinje e shqiptarit.
Policia ende nuk ka një pistë lidhur me këtë vrasje, ndonëse mendohet se ekzekutuesi është larguar në këmbë nga vendi i ngjarjes. 36-vjeçari me origjinë shqiptare kishte kombësi suedeze. Ai ishte pronar i një shtëpie diskografike me zyra në Londër dhe Stokholm./Opinion.al/
