Kryebashkiakja ekuadoriane më e re në moshë, Brigitte Garcia dhe një këshilltar i saj u gjetën të ekzekutuar në makinë, orët e para të së dielës. Lajmi u konfirmua nga policia në shtetin amerikano-jugor, që është mbërthyer nga një valë dhune për të cilën autoritetet fajësojnë trafikun e drogës.
Sipas asaj që shkruan Reuters, trupat e kryebashkiakes 27-vjeçare të San Vicente dhe këshilltarit të saj Jairo Loor, u gjetën në provincën e Manabi. Të dy ishin ekzekutuar me armë zjarri. Garcia ishte pjesë e partisë së ish-presidentit Rafael Correa.
Kryebashkiakja është në mesin e disa figurave politike që janë vrarë kohët e fundit në Ekuador. Në Gusht u vra në atentat kandidati për president Fernando Villavicencio. Një zë i fortë kundër korrupsionit dhe krimit të organizuar, Villavicencio u ekzekutua teksa largohej nga një takim elektoral, 2 javë përpara zgjedhjeve.
Në Janar, presidenti ekuadorian Daniel Noboa shpalli emergjencën shtetërore, pasi vala e dhunës kulmoi me një grup të armatosur që bastisi një stacion televiziv live. Noboa po ashtu shpalli 22 grupe kriminale organizata terroriste. Gjendja e emergjencës u zgjat më herët gjatë këtij muaji.
