Ekzekutimi i vëllezërve Astrit dhe Brahim Bilali paraditen e sotme, tronditi përsëri qytetarët e Shkodrës.
Teksa njoftoi shkarkimin e drejtorit të Policisë së Shkodrës, Vehbi Bushati dhe emërimin në vend të tij Niko Brahimi, Lleshaj tha se krimi goditi përsëri dhe se beteja ende nuk është fituar.
“Sot tentakulat e krimit të organizuar kanë arritur të godasin. Kjo ngjarja ka ngritur në alarm policinë, megjithë goditjet që i janë dhënë krimit në Shkodër përsëri rezulton që lufta ndaj këtij krimi nuk është fituar ende. Mbetet ende shumë për të bërë. Metastazat e këtij krimi treguan sot që janë gjallë dhe kanë mundësinë për të goditur”, -tha Lleshaj.
Duke mos dhënë detaje në lidhje me hetimet për zbardhjen e vrasjes së vëllezërve Bilali, ministri i Brendshëm tha se angazhimi i policisë është i plotë. Po ashtu, ai shtoi se ekzekutimi i vëllezërve në Shkodër është bërë për larje hesapesh
“Hetimet janë në proces të plotë. Nuk mund t’ju them asgjë për hetimet. Di që ka një angazhim të plotë. Janë angazhuar strukturat e policisë për ta zbardhur sa më shpejt këtë rast dhe rastet e tjera që janë në proces për tu mbyllur.
Qytetarët nuk kanë pse të ndihet të pasigurt. E gjithë vëmendja e policisë së shtetit është këtu. Garantojmë se nuk ka hapësira për frikë. Kemi të bëjmë me një rast specifik, sepse kemi të bëjmë me larje hesapesh.”–u shpreh ministri i Brendshëm./ Opinion.al E.Xh.
